Act 2 | BOJ | STEP | Onaqa Juda naŋgo yori bati koba ñam Pentikos di brantej. Juda naŋgo moma naŋgi nami iŋgi meli bunuj otoreleŋeb deqa are qalqajqa yori bati brantonaqa Yesus aqa tamo uŋgasari kalil naŋgi tal qujaiq di koroosib sonabqa laŋ goge dena jagwa koba anjam ato bulosiq tal naŋgi awesoqneb qaji deq aiej. Aisiq tal keretej.

Acts 2

Qotei aqa Mondor aiej

1 Onaqa Juda naŋgo yori bati koba ñam Pentikos di brantej. Juda naŋgo moma naŋgi nami iŋgi meli bunuj otoreleŋeb deqa are qalqajqa yori bati brantonaqa Yesus aqa tamo uŋgasari kalil naŋgi tal qujaiq di koroosib sonabqa laŋ goge dena jagwa koba anjam ato bulosiq tal naŋgi awesoqneb qaji deq aiej. Aisiq tal keretej. 3 Onaqa Qotei aqa Mondor a ŋam puloŋ bulosiqa aisiq segi segiosiqa naŋgo gateq di awoeleŋonaq uneb. 4 Osiqa naŋgo segi segi are miligiq aisiq meŋ bulyetnjrnaqa naŋgi kalil qure segi segi naŋgo anjam mareleŋoqneb.

5 Bati deqa Juda tamo uŋgasari tulaŋ gargekoba naŋgi qure qure kalilq dena bosib Jerusalem di soqneb. Naŋgi kalil Qotei qa louoqneb qaji. 6 Ariya jagwa koba anjam ato bulonaqa naŋgi kalil qusib bosib koroonabqa naŋgo segi segi qure utru anjam mareqnab qusibqa are koba qalsib maroqneb, “Tamo uŋgasari kalil endi Galili qaji. 8 Naŋgi kiersib gago segi segi qure utru anjam mareqnab iga queqnum? 9 Iga kalil qure bei bei qaji. Iga qudei Partia, Midia, Elam, Mesopotemia, Judia, Kapadosia, Pontus, Esia sawaq dena beleŋem. 10 Iga qudei Frigia, Pamfilia, Isip, Libia sawa Sairini sawa jojomq dena beleŋem. Iga qudei Rom dena beleŋem. 11 Iga qudei Juda tamo. Iga qudei Juda naŋgo louqa kumbra dauryeqnum. Iga qudei Krit. Iga qudei Arebia qaji. Naŋgi kiersib gago segi segi qure utru anjam na Qotei aqa wau kokba deqa mareqnab iga queqnum?” 12 Tamo uŋgasari naŋgi anjam degsib marsibqa naŋgi are koba qalsib segi segi maroqneb, “Naŋgi kumbra di kiersib yonub?” 13 Onaqa tamo qudei naŋgi yomuosib mareb, “Naŋgi wain bunuj uysib deqa nanariosib anjam laŋa laŋa mareqnub.”

Pita a anjam palontej

14 Onaqa Yesus aqa aŋgro 11-pela naŋgi Pita ombla na tigelosibqa Pita na aqa medabu waqtosiqa endegsi minjrej, “Niŋgi Juda tamo ti tamo uŋgasari kalil Jerusalem qureq endi so qaji niŋgi ti ijo anjam endi qusib poiŋgem. 15 Niŋgi maronub, ‘Tamo naŋgi di wain uysib nanarionub.’ Di sai. Endego nobqolo koba. Wain uyqa bati sai. 16 Kumbra endeqa Qotei aqa medabu o qaji tamo Joel a nami endegsi marej, 17 ‘Qotei a marqo, “Diŋo bati jojomamqa e na ijo Mondor qariŋyitqa tamo uŋgasari kalil naŋgoq aiqas. Aisim nuŋgo aŋgro mel ti nuŋgo aŋgro sebiŋ ti naŋgi siŋgila enjrimqa naŋgi ijo medabu osib ijo anjam maroqnqab. Nuŋgo aŋgro wala naŋgi ti nuŋgo tamo bole bole naŋgi ti areqalo waqtetnjroqnitqa ŋeiobilqeioqnsibqa ijo kumbra gargekoba unoqnqab. 18 Bati deqa e na ijo Mondor qariŋyitqa ijo wau tamo ti ijo wau uŋa ti naŋgoq aisim siŋgila enjroqnimqa naŋgi ijo medabu osib ijo anjam maroqnqab. 19 Laŋ goge dia e na maŋwa gargekoba yoqnqai. Mandamq dia dego maŋwa gargekoba yoqnqai. Leŋ ti ŋamyuo ti qurem koba ti qariŋyit mandamq aiqas. 20 Seŋ ambruqas. Bai lentosim leŋ bulqas. Amqa nuŋgo Tamo Koba a riaŋ koba ti siŋgila koba ti bqas. 21 Bati deqa tamo uŋgasari gargekoba naŋgi endegsib pailyqab, ‘O Tamo Koba, ni na iga aqaryaigime.’ Yimqa a na naŋgo pail qusim naŋgi kalil eleŋamqa naŋgi so bole gaigai sqab.” ’ Qotei aqa medabu o qaji tamo Joel a nami anjam degsi marej.

22 “Deqa Israel tamo uŋgasari, niŋgi ijo anjam endi quiye. Niŋgi qalie, Qotei na Yesus Nasaret qaji a qariŋyonaq mandamq aisiqa kumbra gargekoba nuŋgo ambleq di yoqnej. Kumbra yeqnaqa niŋgi unoqnsib maroqneb, ‘Bole, Qotei na Yesus qariŋyonaq bej.’ 23 Qotei na tamo di osiq nuŋgo baŋq di atej. A nami kumbra degyqa are qalsiq deqa anjam keretej. Onaqa niŋgi na Yesus osib tamo uge naŋgo baŋq di atnabqa naŋgi na osib ŋamburbasq di qalnab moiej. Nuŋgo kumbra dena niŋgi segi na Yesus qalsib moioteb. 24 Onaqa Qotei na Yesus olo subq na tigeltosiqa moio gam kobotej. Di kiyaqa? Moio na Yesus a olo ojqa keresai. 25 Agi Devit a nami Yesus qa endegsi marej,

‘Ijo Tamo Koba a bati gaigai ijo ulatamuq di sonaq uneqnum.
A ijo baŋ woq di unu deqa e padalqasai.
26 Deqa e tulaŋ areboleboleibqo. E arebolebole na anjam mareqnum.
Iŋgi bole bole kalil Qotei na e ebqajqa nami marej qaji e di oqajqa tariŋoqnsim unum.
27 Ni na ijo qunuŋ uratim moio qureq aiqasai.
Ni na ino segi aŋgro bolequja Kristus aqa jejamu dego subq di uratim qusaqasai.
28 Ŋambile sqajqa gam di ni na e osorbonum.
Ni e ombla sqam deqa e tulaŋ areboleboleibqo.’
Devit a nami anjam degsi marej.

29 “O ijo was niŋgi quiye. E bole merŋgwai. Gago moma Devit a nami moinaqa subq ateb. Aqa sub agi bini unu iga gaigai uneqnum. 30 Nami Qotei na Devit minjej, ‘Mondoŋ ino leŋ naŋgi paraosibqa dena tamo bei ŋambabqas. Amqa e na tamo di giltitqa ni mandor koba unum dego kere a kamba ino sawa osim Mandor Koba sqas.’ Qotei na nami Devit anjam degsi minjej. Osiqa aqa anjam di siŋgilatosiqa olo minjej, ‘E ijo anjam di uratqasai. E dauryqai.’ Devit a Qotei aqa medabu o qaji tamo bole. Deqa kumbra Qotei na mondoŋ yqas qaji di Devit a nami qalieej. Osiqa Kristus qa endegsi marej, ‘Bunuqna a subq na tigelqas.’ Osiqa marej, ‘Qotei na Kristus moio qureq di uratqasai. Aqa jejamu dego subq di uratim qusaqasai.’ 32 Yesus qujai di Qotei na subq na tigeltonaqa iga kalil ŋamdamu na unem. Deqa bini iga a qa mare mare laqnum. 33 A laŋ qureq oqsiq ñam kobaquja osiq Qotei aqa baŋ woq di awesoqnej. Osiq Qotei aqa Mondor niŋgi nami eŋgwa marej qaji di aqa Abu aqaq dena yaiyosiqa qariŋyqo aiqoqa niŋgi unsib nuŋgo dabkala na dego quonub. 34 Devit a subq na tigelosiq laŋ qureq oqosai. Ariya a Kristus qa endegsi marej,

‘Tamo Koba Qotei na ijo Tamo Koba Kristus minjej,
“Ni ijo baŋ woq endi awo.
35 Awesoqnimqa e na ino jeu tamo kalil naŋgi eleŋosiy ino sorgomq di atitqa ni na naŋgi taqatnjroqnqam.” ’
Devit a nami Kristus qa degsi marej.

36 “Deqa Israel tamo uŋgasari, niŋgi kalil ijo anjam endi geregere qusib poiŋgem. Yesus agi niŋgi na ŋamburbasq di qalnab moiej qaji a Qotei na olo osiqa gago Tamo Koba Kristus atej.” (Ñam Kristus di aqa damu, “Tamo Qotei na nami giltej qaji”) Pita a na tamo uŋgasari naŋgi anjam degsi minjrej.

Tamo uŋgasari gargekoba naŋgi are bulyosib yanso eb

37 Onaqa naŋgi Pita aqa anjam di qunabqa anjam dena naŋgo are qametnjrej. Deqa naŋgi na Yesus aqa aŋgro naŋgi Pita ombla minjreb, “O gago was niŋgi na mergiye. Iga kieronamqa Qotei na iga eleŋamqa iga padalqasai?” 38 Onaqa Pita na kamba minjrej, “Niŋgi segi segi are bulyosib Qotei aqaq boiye. Babqa iga Yesus Kristus aqa ñam na niŋgi yansŋgonam Qotei na nuŋgo une kalil kobotetŋgwas. Osim aqa Mondor Bole niŋgi laŋa eŋgwas. Awai saiqoji. 39 Qotei a nami marej, ‘E niŋgi ti nuŋgo aŋgro ti tamo kalil isa isaq di unub qaji naŋgi ti ijo Mondor eŋgwai.’ Qotei a nami degsi marej. Deqa niŋgi quiye. Qotei na aqa anjam di uratqasai. Tamo uŋgasari kalil gago Tamo Koba Qotei na metnjrim aqaq bqab qaji naŋgi aqa Mondor enjrqas.”

40 Pita a anjam deqaji gargekoba siŋgila na naŋgi minjroqnej. Osiqa olo endegsi minjrej, “Niŋgi geregere ŋam atsib soqniye. Tamo uŋgasari bini bati endeqa unub qaji naŋgi kumbra uge uge yoqnsib laqnub. Deqa niŋgi naŋgo kumbra uge di dauryoqnaib. Uratosib soqniye. Niŋgi naŋgi ti Qotei na padaltŋgo uge.” 41 Onaqa tamo uŋgasari kalil Pita aqa anjam di qusib naŋgo are miligiq di ateb qaji naŋgi yansnjreb. Bati deqa tamo uŋgasari 3,000 naŋgi Yesus qa naŋgo areqalo siŋgilatosib tamo uŋgasari nami Yesus qa naŋgo areqalo siŋgilateb qaji naŋgo miligiq aisib koba na soqneb.

Yesus aqa tamo uŋgasari kalil naŋgi are qujaitosib soqneb

42 Tamo uŋgasari Yesus qa naŋgo areqalo siŋgilateb qaji naŋgi bati gaigai Yesus aqa aŋgro 12-pela naŋgo anjam quoqnsib dauryoqneb. Naŋgi bati gaigai are qujaitoqnsib bem gentosib uyoqnsibqa Qotei pailyosib soqneb. 43 Qotei na Yesus aqa aŋgro 12-pela naŋgi siŋgila enjreqnaqa naŋgi maŋwa gargekoba yoqneb. Onaqa Yesus aqa tamo uŋgasari naŋgi kalil maŋwa di unoqnsib Qotei aqa ñam soqtoqneb. 44 Tamo kalil Yesus qa naŋgo areqalo siŋgilateb qaji naŋgi bati gaigai korooqnsibqa naŋgo areqalo qujaitosib soqneb. Naŋgo iŋgi iŋgi kalil di koba qaji degsib maroqnsib Yesus aqa tamo uŋgasari kalil naŋgi jeisib enjroqneb. 45 Naŋgo mandam ti naŋgo iŋgi iŋgi ti qariŋyeleŋeqnab tamo qudei naŋgi na awaiyoqnsib silali enjreqnab oqnsib Yesus aqa tamo uŋgasari iŋgi iŋgi saiqoji soqneb qaji naŋgi jeisib enjroqneb. 46 Naŋgi bati gaigai naŋgo areqalo qujaitosib sosibqa Juda naŋgo atra tal miligiq dia korooqnsib louoqneb. Naŋgo segi segi talq dia dego korooqnsibqa bem gentosib uyoqneb. Naŋgi kalil arebolebole ti lawo na sosibqa Qotei aqa ñam soqtoqnsib koba na iŋgi uyoqneb. Degyeqnabqa tamo kalil naŋgi Yesus aqa tamo uŋgasari naŋgo kumbra di unoqnsibqa naŋgi qa tulaŋ areboleboleinjroqnej. Bati gaigai tamo uŋgasari qudei naŋgi are bulyeqnab Tamo Koba Qotei na naŋgi eleŋeqnaqa naŋgi boqnsib tamo nami Yesus qa naŋgo areqalo siŋgilateb qaji naŋgo miligiq aioqnsib koba na soqneb.